2. Juli 2007

so, zrugg vo roma und scho wieder ä wuchä verbii....

letschtä mittwuch isch wieder superschön wätter gsi und so isch wieder strand ufem tagesprogramm gschtandä! am abig bini mit dä melanie und dä tarja (das isch ä finnin... wo au bi üs idä schuel gsi isch (aber leider nüt glernt hät, drum redt sie immer englisch, was mich nöd wiiter stört, ich redä eifach italienisch mit ihre hihi) is stadt öpis go trinkä... mir händ üs vonere bar bzw. vo dä schönä grüenä stüähl dussä verfüähre lah und sind denn nach eim grusigä caipiroska bsoffä gsi... er isch so starch gsi das mer äs wasser däzue beschtellt händ und das nahglärt händ... vo crashed ice händs au no nie öpis ghört!   aber s isch denn alles in allem natürlich ganz en luschtige abig gsi! 

am dunschtig simmer nachem strand in apero... bzw. dem chan mer ja au gratis znachtässä sägä

am fritig hani ussert schuel, strand und packä nöd vill gmacht will............

am samschtig ischs am morgä früäh los nach rom gange........ nachdem mer denn s richtige gleis knapp vor dä abfahrt no gfundä händ, simmer nach 4 stund fahrt in bella roma acho! s hotel hämer nacheme churzä fuessmarsch erreicht und händ üs denn sofort uf dä wäg gmacht zum das schöne rom bi grad no ushaltbarä temperaturä z entdeckä! da d metro station idä nöchi vom hotel zuä gsi isch wills dra umäbaut händ (chan ja au wieder nur mir passierä  ) händ mir halt dä bus gno wo üs direkt zum colosseo bracht hät! au bim zweitä mal wo ich das jetzt gseh han, häts mich wieder total fasziniert...... äs isch eifach wunderschön!! mir händ üs denn äs feinä zmittag gönnt und zwar i dem reschti wo ich vor zwei jahr scho immer gsi bin! dä chellner hät mich sogar no kännt und hät ä schiiss-freuid gha!  nacher ischs wiitergange zu fontana di trevi, piazza di spagna, via condotti (prada, versace, gucci etc.  ), villa borghese, piazza di popolo.... nacheme feinä znacht händ mir üs uf di spanischi treppe gsetzt und s eifach gnossä! nachdem mir üs fontana di trevi und s colosseo au no bi dunkelheit und vollmond (!!) agluegt händ simmer todmüed und kaputt is hotel zrugg!  :o)  am nögschte tag simer relativ früäh wieder ufgschtande, händ knapp dä zmorgä verpasst und händ denn müesä feschtschtellä das mer s gepäck nöd so eifach chönd is schlüssfach tue (isch zuä gsi, wieso au immer....) und s leider au nöd chönd mitneh uf ä touri-bus-tour.... zum glück händ mir ja nöd vill debii gha und sind drum halt mit gepäck zu piazza navona, campo de fiori, panteon und piazza venezia.... nachdem mer gnueg gha händ vo all denä 100'000 turischtä und dä chällner und verchäuferinnä wo alli nur englisch redet, simer zrugg an bahnhof und händ denn am halbi 6i dä zug zrugg heigno... hach, isch das schön gsi is ruhige, italienische rimini zcho!   

roma isch würklich bellissima, aber zu derä jahresziit eifach viiiill z überfüllt und viiiill z turistisch!!
mini empfehlig isch drum: endi september!! denn isches viiiill schöner!!

hüt isch wieder schuel agseit gsi............. mannomann, äs sind 16 russä cho! na bravo! i minere klass zwar nur 5 und no netti, aber ebä... naja, luegemer mal wies chunnt! uf all fäll bini di blöd lehrerin los, nachdem s am dunschtig nümä zum ushaltä gsi isch, hämernä gseit, das mer entweder än wächsel wännd oder suscht erscht wieder chömed wänn d veronica wieder da isch! und siehe da: am fritig hämer 4 stund d ilaria gha und ab hüt denn d ilaria und dä leonardo! di ander seit mer jetzt zwar nümä hoi (wiiiieso ächt das?! ), defür lerni wieder öpis! üsi spanierin wo bis jetzt nur idä konversation bi üs gsi isch, hät hüt gseit, aso zu derä gahni nümä, die isch ja nöd ganz dich, ab morn bini ganz i euierä klass! 

tja und so isch scho wieder ä wuchä umä und ich hoffä jedä tag das d ziit stahbliibt oder wenigschtens äs biiiizli längsämer laufä wür..................